Безглутенска кора со грав

Божик не е само празник.
Божик е емоција,
чувство што те враќа на корените
и ти дава припадност.
Еден од најголемите празници во христијанството.
За Божик важи изреката:
Пред Божик, зад Божик –
кај да си, дома да си.

Бадник пак, има посебно место во моето срце.
Тоа е вечерта
кога моите омилени луѓе
се собираат на трпезата –
посна, проста и скромна,
во домот каде што научив љубов што е.
 
Низ животот,
што во себе и најдоброто и најлошото го чува,
што и радости и премрежја ни дарува,
ретки се годините
кога не сме биле сите на куп.

Мама и тато го направија домот,
го создадоа чувството.
Јас и сестра ми,
потоа дојдоа зетовите,
еден по еден и внуците.
Растеше трпезата,
се ширеше радоста.

И тажните моменти не нè одбегнаа.
Тишина.
Болка.
Празнина што не се надополнува.
Не се преболува – само се учи како да се живее со неа.
И верба дека пази на нас од горе, нè чува.
 
На трпезата, традиционално,
се принесуваат јадења
во кои душата се остава и преплетува:
гравче, сарма, туршија,
јатки, овошје…
И кралицата на вечерта –
едно од моите омилени јадења воопшто:
кора со грав и паричка.

Од неколку состојки направена:
брашно пченично македонско,
вода бистра и пивка,
и гравче тетовско.
И многу љубов и внимание.

И редиш:
Ред кора рачно сукана и потпечена,
ред масло,
ред грав –
а како да велиш
ред магија,
ред надеж,
ред намера.
Се дели и се сече
без никој да биде прескокнат.
Секој да има еднаква можност за среќа.

Се става паричката
и се пече –
и со неа се печат надежите:
наредната година
сите да сме здрави и среќни,
и на број,
и помалку да има искушенија
и повеќе убави моменти.
Да растат децата,
да стареат возрасните,
догодина пак да се собереме.
 
И со џагорот на децата
и радост во срцата,
секој го зазема местото
што свое го вика.
Ги спомнуваме најблиските
и се надеваме на среќа
во годината што следи.

Најстариот во семејството,
главата на истото,
се помолува тивко,
без многу драма.
Ја врти кората три пати
и секој ја зема својата среќа.

Може да е кај најмалото, сугарето –
среќно да биде и расте големо.
Кај поголемото –
успеси да го следат, да е умно.
Кај нас, возрасните –
да сме здрави
и исполнети со љубов и мир.

Може во куќата –
па ќе биде за сите иста среќата.
Или кај Бог –
да нè чува сите.

Како и да биде,
на радоста на другите
се веселиме
како да е своја.
Оти најважно во семејствата
е љубовта да ја делиме
И убави работи да си мислиме
и сакаме.
 
За многу години Бадник.