За смртта не се зборува
Висока беше…
и крупна, вака како тебе.
Многу потсетуваш на неа.
И без да го чуе некој твоето име,
ќе знае дека си и внука.
Од што почина?
Од лошото…
И молк.
Тешка тишина…
И паметна беше.
И нејзиниот збор се слушаше.
И сите ја сакаа…
Што се случи?
Лошото…
И молк.
Тешка тишина…
Остави две мали деца – колку ги сакаше?
Две сонца кои само што ги угреа сонцето,
ќе го минат животот со темна сенка
засекогаш над нив надвишена.
Сопругот – првото либе, недољубено…
Се бореше со злата болест.
Како се чувствуваше?
Како ги поминуваше последните денови
кога смртта во очи ја гледаше,
а срцето од љубов преполно ќе ѝ препукнеше?
И молк.
И тешка тишина…
Животот и без неа ќе продолжи,
а нејзините соништа недосонувани?
Желбите неисполнети?
И молк.
И тешка тишина…
За смртта кај нас не се зборува.
За починатите – уште помалку.
Ова јадење го посветувам на мојата баба – жената што немав среќа лично да ја запознам, но сум сигурна дека во својата кујна подготвувала вакви, топли и едноставни јадења што го собираат семејството околу масата.
Потребни состојки:
- 1 кг компири
- 10 суви црвени пиперки
- 4 јајца
- 200 мл вода
- 3 лажици маслиново масло
- 1 лажичка сол
- прстофат шарен бибер
- буковска пипер за сервирање
Начин на подготовка:
Компирите ги лупиме и ги ставаме да се варат во вода. Во истиот сад ги додаваме и сувите пиперки и вариме додека компирите не се готови. Пиперките ги чистиме од семките и ги лупиме, па заедно со компирите ги пасираме со виљушка во мазна смеса.
(Бидејќи ова јадење е многу често на нашето мени, јас постапката ја олеснив така што во процесор ги ставам пиперките, само исчистени од семките, и додавам еден компир. Пасирам додека не добијам хомогена смеса, па ја додавам во преостанатите компири и сè заедно пасирам.)
Смесата ја префрламе во загреан сад на умерен оган. Ги додаваме водата, солта, маслиновото масло и биберот и мешаме додека убаво не се соедини и загрее. Ги додаваме изматените јајца и готвиме уште неколку минути со постојано мешање, додека јацата не се готови .
Сервираме со малку маслиново масло одозгора и прстофат буковска пипер.
Нутриционистички осврт:
Ова е јадење од неколку едноставни состојки, но со добра хранлива рамнотежа. Топло, заситува и лесно се вари а е комбинација од сложени јаглехидрати, протеини и корисни масти – карактеристична за традиционалните домашни оброци.
Позитивни страни:
Компирите обезбедуваат сложени јаглехидрати и калиум за стабилна енергија и мускулна функција.
Јајцата носат целосни протеини и важни микронутриенти за метаболизмот и нервниот систем.
Сувите пиперки придонесуваат со антиоксиданси и природни растителни пигменти.
Маслиновото масло обезбедува корисни масти и подобра апсорпција на витамините.
Природно е без лактоза и без глутен.
На што да се внимава:
Оброкот има повисок јаглехидратен товар, па најдобро е да се комбинира со свежа салата или друг извор на растителни влакна. Количината масло може да се прилагоди според потреба.
Едноставно, топло и искрено – јадење што ги храни и телото и спомените.
